Homenaxe do BNG de Ames aos Homiños de Boimorto

Homenaxe Homiños de Boimorto 2021
Homenaxe Homiños de Boimorto 2021
Homenaxe do BNG de Ames aos Homiños de Boimorto

Todos os anos por estas datas o BNG de Ames lembra aos Homiños de Boimorto, 6 membros da Corporación democrática do concello pertencente á comarca de Arzúa, coñecidos desde aquela na memoria dos veciños e veciñas de Ortoño como "Os Homiños de Boimorto", asasinados polo franquismo na curva dos Batáns.

O deputado do BNG no Parlamento, Xose Luis Rivas "Mini", describe no seu ensaio "Boimorto: Memoria dun silencio" os feitos e repercusións destes asasinatos e como foron perseguidos e torturados no mosteiro de Sobrado, para ser finalmente axustizados -sen xustiza algunha- na curva dos Batáns de Ames e soterrados na parroquia de Ortoño.

Ao cumprirse 85 anos do seu pasamento este 20 de agosto, desde o BNG de Ames organizamos un acto de recordo, no que participaron veciños e veciñas de Boimorto, xunto con compañeiros e compañeiras do BNG de Ames e xentes de concellos dos arredores e da comarca de Arzúa.

 

https://www.foroporlamemoria.info/2010/07/boimorto-a-historia-da-sublevacion-do-36/

Non se sabe con seguridade, pero case seguro que o día 20 os levaron para Santiago. En Ortoño fusilaron seis. Quedaron tirados na estrada. Os veciños leváronos á igrexa. Alí tiráronlles fotos e inscribírinos nas partidas de defunción como descoñecidos. O cura viu que algúns levaban símbolos cristiáns e enterrounos relixiosamente nunha fosa común. A xente de Ortoño sempre se referiu a eles como “os homiños de Boimorto”. Os veciños usaron ese diminutivo galego de compaixón, de desgraza.

 

Ramón Enjumio, Manuel Espiñeira, Isidro Filloy, Juan Martínez, Xose Tojo e Xosé Barreiro.

Homenaxe do BNG de Ames aos Homiños de Boimorto