Os eventos meteorolóxicos extremos son cada vez máis frecuentes debido ao cambio climático. Estes eventos afectan de xeito importante a zonas como Bertamiráns e Milladoiro, onde a urbanización aumentou de xeito considerable a impermeabilización do solo, o que dificulta a evacuación natural da auga, sumado todo isto á falla de limpeza de cunetas e desaugadoiros. As consecuencias son, maioritariamente, danos en vivendas, comercios, infraestruturas públicas e vías de comunicación.

Ademais, os veciños e as veciñas veñen sinalando en repetidas ocasións puntos críticos de acumulación de auga que, aínda sendo coñecidos, carecen de solucións definitivas. Estas situacións amosan a urxencia de mellorar as infraestruturas de drenaxe, reforzar a prevención e establecer un plan de resposta eficaz ante posibles episodios futuros.

“Consideramos que a protección das persoas, os bens materiais e o patrimonio natural require dun enfoque integral que combine sensibilización, planificación e medidas concretas de prevención e xestión; por iso nesta moción tamén instamos á Xunta de Galicia a fomentar o uso de solucións baseadas na natureza, como a creación de zonas verdes inundables e a restauración das beiras dos ríos”, explica a voceira do BNG de Ames, Escarlata Pampín.

Unha iniciativa en positivo dacordo co xeito de entender a forma de facer política do BNG baseada nas propostas e nas ideas para resolver os problemas da veciñanza.