O BNG PIDE DE NOVO QUE SE ARRANXE TRAS O ROGO FEITO XA NO PLENO DE XULLO E QUE NON FOI ATENDIDO
A veciñanza de Lapido illada ante unha emerxencia polo abandono da ponte
Ames, ano 2025, e hai residentes da parroquia de Ortoño incomunicados fronte a riscos vitais, puidera parecer o argumento dunha serie distópica, pero por desgraza é unha realidade. Son os veciños e veciñas de Lapido que sofren a desidia dun goberno socialista que decide non arranxar a única ponte pola que podería pasar un vehículo de emerxencia para atendelos de forma inmediata.
A veciñanza de Lapido vive preocupada pola desatención que sofren xa que hai un punto no camiño convencional á entrada da aldea que se estreita tanto que impide o paso a calquera vehículo de emerxencia. “É imposible que unha ambulancia ou un camión de bombeiros poida acceder a atender a unha persoa por esta vía” explica Carla Vázquez, veciña de Lapido, “por iso hai anos xuntámonos os veciños e veciñas, recollemos firmas e fixemos unha petición no Concello para que nos habilitaran a ponte como vía excepcional para o paso de vehículos de emerxencia”, lembra.
O problema é que actualmente o estado de conservación da ponte é tan deficiente que imposibilita o acceso ás casas dos vehículos necesarios ante unha situación de emerxencia. “Por este motivo dende o BNG de Ames reiteramos a petición, xa feita en xullo, de que se amañe atendendo ás necesidades da veciñanza”, indica a voceira do BNG de Ames, Escarlata Pampín.
Enlace ao vídeo
https://www.instagram.com/reel/DOWdSiDDcZq/?igsh=MXZ3cjc3a2oybnN0bw%3D%3D
